貓籠？！

養咗貓之後，開始會有少少財政預算，睇吓佢一個月洗幾多錢，但係我之前完全冇諗過需要一個貓籠⋯⋯

自從佢發情過之後，就有咗一個好壞嘅習慣，就係咬人！雖然唔係大力，但係佢一咬住你隻手，好自然地你會揈開隻手唔俾佢咬，但係佢係會衝上嚟再咬，雖然唔係好痛，不過意識極度不良。貓舍姐姐C都睇唔過眼，叫我一定唔可以俾佢咁樣，因為佢越大個就會越大力，到時控制唔到就好得人驚⋯⋯於是老公同我就決定咗買一個貓籠比佢做「冷靜角」。

其實我都唔想困住佢，10分鐘都唔想，因為覺得佢會好慘⋯⋯但係冇辦法，唔想佢變得越來越惡、越來越失控，唯有咁做，希望佢之後乖啲就可以收埋佢啦！