Litter Kwitter 廁所板 (第一階段)

第一次將Litter Kwitter廁所板由地下搬上人用廁所高度，對於彈跳地麻麻嘅Max黎講都係一個新挑戰，所以我地特登出去咗買一張浴室櫈仔俾佢行上去。為咗俾佢知個廁所搬咗位，我等佢食飽飽之後就抱佢上去望下，睇下佢駛唔駛去廁所。

好在，我抱左Max兩次之後，好快佢就知道廁所既新位置喇。

第一次跳上梳化後面

前幾日Max先至識跳到上梳化，跟住無啦啦同老公坐喺度睇電視嗰陣，突然間喺條頸後面feel到一舊毛刷身而過，我擰轉個頭一望，發現原來Max已經係後面企左係度，同老公啲模型公仔對峙緊！

第一次跳上梳化

見佢啱啱返到嚟矮得得，淨係好似狗仔咁識得係個地下到行下行，但係到咗第三日，「噗」一聲就跳咗上嚟梳化，跟住仲瞓得好舒服添！

貓貓加入黃家

因為要打齊兩支針先可以離開貓舍，我同老公等左一個月先可以接走隻貓。原本晏晝要教書，但係因為時間關係，我就請左假，老公亦都早放左，我地下晝5點鐘就一齊去錦上路接走隻貓仔。

貓舍姐姐C同埋貓舍哥哥E 首先車左我同老公一齊去元朗獸醫診所同貓貓做一次全身檢查，佢係架車度不停咁細細聲嗌… 去到獸醫度又驚驚青青，好在獸醫話佢好健康，個肚仔仲脹卜卜，貓舍姐姐C話佢出門口之前俾左雞肉佢食，哈哈。當日貓貓兩個月零兩個星期，磅重1.45kg，好正常。

之後貓舍哥哥E車返我地一齊去貓舍， 仲教埋我地點樣同貓貓沖涼同剪手甲，真係好好。貓舍姐姐C係我地臨走之前俾左好多貼士我地，話如果唔知點樣照顧貓貓既話，隨時可以whatsapp佢，簡直係同我地打左強心針！

不過貓貓第一次沖涼個陣就真係驚到癲左… 

之後佢去埋風乾，驚到縮埋一舊…

撘埋的士，返到屋企都已經淩晨1點，我同老公雖然好眼訓，但係同一時間亦都好興奮，因為從此之後，屋企多左個新成員！

帶貓貓返屋企前－準備三

除咗防貓網、貓樹之外仲有其他野要準備。

不鏽鋼水兜、飯兜、玩具

Litter Kwitter廁所板

冇咁容易俾管理員發現嘅貓袋同埋頸帶

豆腐渣貓砂（可沖廁）

去毛球膏

洗耳水

指甲鉗

由銅鑼灣買到灣仔，由地下鋪買到網上鋪頭，原來真係好多野買⋯⋯

帶貓貓返屋企前 - 準備二

除咗貓砂盆之外，貓樹就係最緊要有嘅傢俬，因為你都唔想因為有咗貓貓之後，屋企嘅梳化、窗簾、手袋、軟皮喼就爛晒，係咪？我聽過有啲人話佢地啲梳化係抓到見木，要每隔兩年買一張新⋯⋯當佢整爛你屋企嘅傢俬之後，你一定會好唔開心，有機你會發貓貓脾氣，咁樣對大家嘅關係都唔好，所以貓樹係非常緊要！

至於點樣揀一個貓樹？出到去見到五花八門，平嘅一百幾十，貴嘅千幾蚊都有，都唔知點揀。其實都冇乜大所謂，最緊要睇下你屋企可以放到幾高，同埋有多啲啲麻繩俾佢抓。

買貓樹之前，首先用鐵尺喺屋企度量度高度之後，出去買就方便好多啦，至於麻繩高度，最好係成貓伸展到嘅長度為準，因為太短嘅話，貓貓大個咗會頂頭，覺得唔好玩，咁樣你屋企就同冇貓樹冇分別。

揀啱款式之後，當然襯埋屋企顏色就最好啦！

帶貓貓返屋企前 - 準備一

貓舍哥哥E千叮萬囑我哋，帶貓貓返屋企之前一定要有要裝防貓網，因為如果唔係就會變成「飛天貓」，造成慘劇。

於是我就搵咗一間鋁窗公司，幫我地整晒全屋企嘅窗口，其實有好多好處，因為除咗防止貓跳樓之外，夏天可以防蚊，將來又可以防止小朋友跌落街，感覺上好似抵啲。

好在整完之後，都冇阻礙到景觀，唔錯唔錯！

至於拆出嚟洗亦都唔麻煩，跟住搵水沖吓又乾淨啦！

因為有地方安裝唔到防貓網，於是就用咗高密度嘅鋁窗，雖然平啲，不過感覺就好似變咗監獄⋯⋯

好嘢，搞掂左第一步，將來可以安安全全咁同貓貓生活！

同貓貓改名

貓貓係CFA (Cat Fanciers' Association) 貓會註冊既，簡單咁講，即係有血統既貓貓，有出世紙。貓舍哥哥E要我地快D諗好個名，俾佢遞返上貓會。

最開頭，我同老公見佢大大隻，四肢發達，但係反應就…比較遲鈍，就叫佢做Chuck (Chuck Norris)。

但係睇落去佢個樣又好似好斯文，唔似咁粗魯，所以放棄左呢個名。

去左IMDB, 連同BB改名網頁都望埋。順便一提，原來係有網頁係特別為貓貓而設架！

因為我地都好鍾意Russell Crowe既 Gladiator，主角係叫做Maximus，於是，我地就同貓貓改名做Maximus喇。