兩隻貓，兩種性格

第一次見到一堆小貓嘅時候，我相信大家嘅反應都係：「好得意呀！！」但係返到去屋企，其實佢地係唔係一樣嘅呢？

漸漸地，你會發現佢哋嘅性格，隻隻都好鮮明，同你啱啱認識佢嘅時候，係會有一定嘅出入。諗返都會有少少覺得似買六合彩開奬⋯⋯

一個多月嘅Miriam同Maximus

開始嘅時候，三個月嘅Max係好鍾意玩電線同咬電線，而且都唔係太鍾意人抱。

同咗人一齊住之後，Max就變得比較鍾意人，而且間中會走上床陪你一齊瞓⋯⋯一陣。

而家十個月嘅Max，會鍾意搵人，但係唔鍾意你煩佢，唔再咬電線，反而鍾意懶洋洋咁訓係地下，或者枱上面。唯一冇變嘅，佢都係唔係太鍾意食嘢。

三個月嘅Miri係有少少神經質，一聽到有怪聲，就會縮左落梳化底，同埋一抱起嘅時候會扭來扭去。

依家五個月嘅Miri，好鍾意跟住人，佢係會做Max從來唔會做嘅嘢，就係跳上人嘅大髀上瞓覺，而且係人去咗邊，佢就喺邊。

第一次出大廳

因為想兩隻貓盡快一齊生活，於是日抖就將整個帳幕撥搬出大廳，夜晚先至將帳幕放返入電腦房，令兩隻貓貓嘅氣味係屋企混合一體。

Max當然好興奮啦，係咁喺帳幕附近走來走去，但係間中會跳上帳幕頂，宣示主權。

當然，放Miri出來一定要睇實…

貓妹妹有新名啦

第一次見到貓妹妹嘅時候，見到佢頭上面有一個巨型M字，而且Maximus個名都係M字頭開始，所以諗住貓妹妹個名都係M字頭開始。

但可以叫乜名好呢？

五月頭嘅時候我有一個德國交換生朋友嚟咗香港搵我，佢叫Miriam，花名 "Miri"，覺得幾聽，又容易叫，所以就同貓妹妹改咗名，叫Miriam喇。

後記：

原來貓妹妹同胎嘅姐妹，不約而同係M字頭！

左：Momo ，中：Mila ，右：Miriam

貓奴生活嘅改變

因為嚟咗貓妹妹之後，Max成日覺得佢嘅愛俾人分薄咗，所以變得好敏感，同埋小氣。

好在貓奴J提過我一個口號，叫做「以大為先」，乜嘢都係俾咗大嗰個先，咁成件事就會好好多。

同埋我哋要比200％嘅關心俾Max，同佢玩嘅時間多咗一倍，摸佢嘅時間又多咗一倍，而且要比好多信心佢。呢個週末，老公同我都留喺屋企陪佢地。

好在貓妹妹都好乖，雖然我哋冇乜理佢，但係佢都照玩、照食、照去廁所，冇乜大問題。一見到我地入房，佢就會跳下跳下，好似狗仔咁樣。

兩隻貓貓初次見面

聽到貓奴朋友J話，加一隻新貓係要好有技巧嘅一件事，因為貓貓係唔係太鍾意改變嘅一種動物。佢屋企有三隻貓（三隻都係男仔），起初大哥哥見到二哥嚟屋企嘅時候，佢都成日fee二哥，所以朋友J千叮萬囑一定要小心小心。

係我哋拎嘢食俾貓妹妹，只係過咗兩日，一個不留神Max衝咗入電腦房見到⋯⋯

你係邊個？！

唔知係Max蠢，定係對家係女仔，佢都冇兇人哋，只係聞聞聞，唔肯走。

來多新一個朋友

久而久之，覺得只有一隻貓喺屋企，只係同人玩，其實係好悶嘅一件事，雖然話人會同佢玩，但只一日係玩15分鐘，而且始終人同貓都係有代溝，左諗右諗最後就帶多一個朋友嚟陪佢。

2015年5月21號，我哋帶咗一隻貓妹妹，返屋企嘅時候佢都係啱啱三個月大，佢都係一隻銀色嘅美國短毛貓，不過始終係女仔返嚟嘅時候只係得1.15kg，比起Max剛嚟有1.45kg。

我哋返到屋企第一件事就係將貓妹妹放入電腦房入面嘅帳幕，俾一個小小嘅空間貓妹妹去適應，但係暫時都唔可以俾Max見到，怕佢唔習慣，只係比佢聞下，知道屋企而家有兩隻貓～

點解陣味咁奇怪嘅？

睇完獸醫嘅兩日後

食咗兩日藥之後，見到Max佢精神好返左好多，乞嗤又少咗，又肯玩，而且仲食返多好多嘢。我估果隻開胃藥好犀利，食1/4粒已經係咁食飯，仲好似食得多過平時！

之前聽姑娘講，話餵貓貓食藥係好似打仗一樣咁辛苦，不過好在以前貓舍姐姐C教過我要日日俾Max食魚油丸，等佢身體打好個底。除此之外，而家Max佢朝朝見到藥丸都太唔抗拒，所以都唔算好困難。

我上網查過Mirtazapine呢隻藥，話除咗會開胃之外，副作用係會令貓貓好hyper，不過好在Max感冒緊本身係傻下傻下，呢隻藥會令佢精神啲都唔係壞事嘅。

希望佢食多啲野，抵抗力好啲，咁就快啲好返啦！

打敗仗

過咗兩日都仲打乞嗤，仲要越嚟越犀利，跟住又無晒心機食嘢、眼水一路照流、走上床叫我地起身嘅時候，打乞嗤打到我同老公成面都濕晒 >_<，喺無辦法嘅情況之下，唯有同佢約睇獸醫。

去到診所，今日係獸醫叔叔T當值，佢係第一次見到Max，跟住就問我地佢嘅近日健康情況，喺診所嗰度磅重3.13kg，比平時輕咗0.07kg。Max無啦啦都打咗兩個乞嗤，打到人哋個工作枱濕晒⋯⋯之後有獸醫叔叔同埋姑娘姐姐幫佢探熱（肛探），39.1度，好在都叫做正常，不過佢就好唔願意探熱，係咁嗌，好快診斷係貓感冒，開咗抗病毒、抗生素同埋開胃俾佢食。

抗病毒藥要食三個星期，嚇死我！

有十日份量，呢個抗生素幾好味，食咗佢竟然舔舔脷，之後有胃口食飯！

貓貓作感冒？

以前我媽咪養咗隻蘇格蘭摺耳貓Zara，由寵物店帶返到屋企嗰陣時病得好犀利，去咗睇獸醫，原來係貓感冒，係可以死架！當年睇咗成個月醫生，不停咁食藥同複診先至好返。見到Zara病得咁辛苦，成個月都令到我媽咪同我都好擔心佢，所以我對貓貓作感冒有感冒徵兆會好大反應。

貓貓感冒嘅徵兆有：不停流黃綠色眼屎、眼皮腫漲、打乞嗤、唔食野、冇精神、悶悶不樂，同埋成日瞓覺。

Max啱啱返屋企頭一兩日因為轉左新環境，所以都有輕微嘅感冒症狀，好似有打乞嗤、同埋有少少黃色眼屎。所以我帶佢去打第三支疫苗嗰陣，都係咁問獸醫姐姐K點算。

獸醫姐姐K同我講，幼貓感冒分為一級至道十級，由於小貓抵抗力差，唔多唔少都一定有少少感冒症狀，不過只係程度唔同。大個咗抵抗力就會好好多，所以唔使太緊張。

至於當時Max有黃色眼屎，同埋一日有5－6個乞嗤，即係點樣？

獸醫姐姐K話，Max屬於一至二級感冒，所以可以放心。如果嚴重嘅話(八級以上)，眼皮會腫到隻眼擘唔開、唔肯食嘢、唔肯玩，同埋無嚟精神。

至於護理方面，每日要用棉花濕少少暖水清潔眼睛，之後滴眼藥水，直至停咗流眼屎為止，同時亦都要保持空氣流通同埋家居清潔。如果病情冇好轉，就要返去睇醫生。

經驗之談，通常四至五日之後就唔會再流眼屎。同埋見到佢有少少感冒嘅時候，一定要同佢玩多啲！因為做運動可以增強抵抗力，令佢快啲好返，當然飲食上都要配合啦！

貓貓肚痾？！

其實Max佢一路腸胃都唔錯，日日都有去廁所，每日大便一次，小便兩次。

佢由屋企到而家，主要都係食開兩隻貓糧：Pro Plan 同腸胃糧，其實因為想佢肥少少，所以兩隻糧會溝埋一齊食。

Pro Plan貓糧

腸胃貓糧

平時貓糧上面，我都會加少少新鮮煮嘅餸俾佢：例如雞肉、三文魚或吞拿魚撈埋食，等佢同時間食乾糧同濕糧，既有足夠嘅營養之外，又冇咁容易生腎石。不過好多時，佢就咁食晒啲新鮮餸就走左去，乾糧就剩返晒係度，除非吽到好肚餓佢先至肯食埋⋯⋯

正因為Max係唔鍾意食乾糧嘅貓，所以一包正常食一個月嘅糧，佢都要食起碼兩個月，慢到我都驚包貓糧會潮濕同過期，所以我會等到食晒先至會再訂。

Pro Plan貓糧終於食晒喇，見到糧筒仲有大約一個星期嘅腸胃貓糧，我等佢食到八八九九之後，我尋日order Pro Plan貓糧，好在即日到貨，即刻有得食。

於是我就即刻開包Pro Plan貓糧，「叮叮咚咚」咁倒落去差唔多空空如也嘅糧筒入面，跟手拎少少比Max即刻開飯，不過佢都係反應麻麻，仍然都係要加餸撈貓糧。

唔知係唔係隔左成個星期無食Pro Plan，突然間食返個肚唔係太習慣，今日竟然痾爛屎，而且仲放左兩個好臭嘅屁！

我記得貓舍姐姐C講過，如果貓貓腸胃唔好，就俾白飯撈雞1：1佢食。咁今日淨係食呢樣野，希望佢腸胃變返正常啦！

日本米加埋巴西雞，呢餐都唔差架。

後記：

全日淨係食雞肉同埋飯之後，第二日啲便便正常返，安心晒！不過見到佢淨係食雞肉同飯，乜嘢味都冇，真係好悶，悶到食剩晒啲飯⋯⋯

Max係唔係食欲不振？我好肯定佢唔係！因為我食飯嗰陣，佢係咁跳上張枱度來想舔我個碗 (當時食緊蠔豉肉餅飯)，不過我梗係冇比佢食啦，佢唯有死死地氣食飯佢自己嘅雞肉撈飯⋯⋯

最後要退一步，食返腸胃糧之後，啲便便就變返正常啦，等多幾日，遲少少同佢轉返Pro Plan啦！

貓貓咬人

其實去到7個月咁大個仔，都唔應該咬人。叫咗佢三次"No"都係咁衝過嚟咬我隻手，無奈地就要擺佢入去貓籠度坐，用電話set咗十分鐘，夠鐘就放佢出嚟。

放左佢入去，Max不停咁樣大嗌，嗌足十分鐘，再咁落去真係會俾人投訴⋯⋯

終於夠鐘放Max出返嚟，佢即刻變得好乖，又係咁搵個頭掂我添，我其實都好內疚⋯⋯

Max ，你乖啲啦，唔好咬人好冇？

後記

呢個方法真係work，第二日佢又再咬我隻手，我"No"佢，佢好似聽得明，真係停咗口 :)

貓籠？！

養咗貓之後，開始會有少少財政預算，睇吓佢一個月洗幾多錢，但係我之前完全冇諗過需要一個貓籠⋯⋯

自從佢發情過之後，就有咗一個好壞嘅習慣，就係咬人！雖然唔係大力，但係佢一咬住你隻手，好自然地你會揈開隻手唔俾佢咬，但係佢係會衝上嚟再咬，雖然唔係好痛，不過意識極度不良。貓舍姐姐C都睇唔過眼，叫我一定唔可以俾佢咁樣，因為佢越大個就會越大力，到時控制唔到就好得人驚⋯⋯於是老公同我就決定咗買一個貓籠比佢做「冷靜角」。

其實我都唔想困住佢，10分鐘都唔想，因為覺得佢會好慘⋯⋯但係冇辦法，唔想佢變得越來越惡、越來越失控，唯有咁做，希望佢之後乖啲就可以收埋佢啦！

喵星人大作戰3 貓展

呢個係第三次參加香港嘅貓展當日總共有39隻幼貓、75隻成貓、同埋31隻家貓參加比賽。

幼貓係指有出世紙、四個月到八個月以內嘅貓貓。

成貓係指有出世紙八個月或以上嘅貓貓。

家貓係指其他八個月或以上嘅貓貓。

參加比賽嘅規定，貓貓係一定要身體健康，幼貓要打晒3支防疫針，成貓同家貓每年打一支三合一預防針先至可以參加。如果係大型比賽，更加要由獸醫檢查過先至可以進入會場。

今次Max同左三個朋友仔Hobbs, Donut 同Cobra一齊參加比賽，因為隻隻都肥肥白白，所以大家分別都有絲帶做奬品^^

每個參賽者都有禮物架！

比實花絮

夜晚唔俾人訓覺

尋晚11點幾我同Max玩左羽毛，諗住佢放完電好訓訓，點知佢又嘈生晒，明明都做左絕育手術啦，點解都係咁嗌？唉，攪到大家又無得訓，激到老公癲左…

於是我就打去獸醫求救，係診所姑娘接電話。

我: 你好呀，我地Max兩個星期絕育手術架，但係而家佢夜晚都係咁嗌，點算好呀？

姑: 首先，你要分清楚係叫春問題，定係行為問題。

我: 但係佢絕左育架喎…

姑: 其實絕左育都要起碼一頭半個月，等D 賀爾蒙散左先得。如果係行為問題既話，你地夜晚習慣係點架？

我: 平時訓覺我地都係閂門訓，但係一閂門，佢就嘈。放左佢出去之後，又係咁叫，如是者係咁嗌左成晚。

姑: 咁有機會佢要你地開門，或者可能要考慮整個貓門俾佢喎。不如你試下今晚開門訓，睇下有冇好到啦。

希望今晚開左門會有改善啦！

---

後記：

開咗門比佢之後，夜晚冇左咁嘈。但係一朝早都係不停咁嗌(開飯)，依家唯有等啲荷爾蒙慢慢散⋯⋯

如何抱貓貓

紙盒

人類眼中無用嘅嘢，喺貓貓眼中係寶物。

通常屋企收到包裹，一定係拎走入面嘅嘢，之後就拎把界刀出嚟處理左佢。

但係當我走去搵界刀之際，就見到呢個畫面。


同樣，咁矮既士多啤梨盒都唔放過。。。




其實因為紙盒俾到貓貓安全感，有少少包住既感覺好正，連動物行為學家都話紙盒可以同佢地減壓，對貓貓既心理係有幫助。

Why Do Cats Love Boxes So Much 於2015年2月9日發佈

所以而家唯有定期更換新既紙盆俾佢啦，始終紙盒擺太耐會吽蟲，唔衛生。

Litter Kwitter 廁所板 (第二階段)

好喇，新一年新開始，係時間學新野。

Litter Kwitter 廁所板用左橙色圈，同之前紅色圈既分別，係中間開左窿，即係話，Max 屙落人廁所嘅廁所㝫入面。有乜好？

第一，自始之後，貓砂用量就可以慢慢減少。

第二，如果佢學曉咗屙落個窿度，即係話人同貓接觸大小異便嘅機會大大減少，大家都可以衛生啲。同人一樣，㩒個制，乾淨晒！其實貓貓聞到自己啲排泄物味道都會好不安，會用手係咁刮係咁刮，因為本能上佢地唔想俾野外嘅敵人發現貓貓既行踪，如果唔係好容易俾其他捕獵者食咗，因而覺得好危險。

第三，做貓奴既人就可以唔駛日日鏟屎鏟，㩒個制，同貓貓抹下手腳同pat pat就攪掂。

有利當然有弊啦，佢見到個廁所開咗個窿，見到啲水郁下郁下好得意咁，伸隻手入去玩下水先，再唔係塞埋個頭入去望下！大佬呀，香港廁所係用鹹水架，好污糟架！所以開頭果幾日最好睇住佢用個橙色圈，唔係就大鑊喇…

開頭個陣，Max成日都屙去個邊度，其實做清潔既貓奴嚟講係仲麻煩，因為啲大小異便攝住喺啲邊位，好難清理架。不過，過咗兩個星期之後，Max已經屙正中間個窿入面，所以清理上輕鬆左好多。

問: 咁佢唔會唔唔識用返一般嘅貓砂盤？

答: 絕對唔會！去貓展嘅時候俾返普通砂盤佢，佢都即刻用得返，不過佢會有少少唔習慣，因為個砂盤刮極都臭臭地…